As cinco Indicacións Xeográficas Protexidas (IXP) de viños de Galicia deron un novo paso conxunto coa posta en marcha da súa 3ª iniciativa de cooperación, un proxecto coordinado polo GDR Pontevedra-Morrazo en colaboración con outros catro grupos de desenvolvemento rural (Salnés Ulla-Umia, Deloa, Mariñas-Betanzos, Montes e Vales, Adercou) e coa Asociación das cinco IXP de Viños de Galicia.

Este programa ten como obxectivo reforzar o papel das Indicacións Xeográficas Protexidas como motor de desenvolvemento local e consolidar o enoturismo como unha ferramenta estratéxica para dinamizar a economía, poñer en valor o territorio e ofrecer experiencias de calidade a quen visita estes territorios.

Un proxecto para crear valor

O enoturismo representa unha oportunidade única para dar a coñecer os viños das IXP, aumentar a súa visibilidade e recoñecemento e xerar riqueza no rural. Ademais, permite integrar o patrimonio, o traballo das adegas, os produtores locais e a hostalería arredor dunha proposta conxunta, sostible e de futuro.

As IXP de viño de Galicia diferéncianse por manter un modelo baseado na autenticidade, a diversidade e os valores artesanais, coa produción en pequenas adegas cun forte arraigo histórico e unha estreita relación co territorio.

Os viños que elaboran son a mellor mostra da identidade cultural galega: viños que falan de nós, das nosas terras e das persoas que as coidan.

Cinco zonas de grande interese enoturístico

Actualmente existen cinco IXP recoñecidas en Galicia:

• Betanzos
• Val do Miño-Ourense
• Ribeiras do Morrazo
• Terras do Navia
• Barbanza e Iria

Cada unha destas indicacións protexidas ofrece unha riqueza paisaxística, cultural e gastronómica que vai máis alá da copa de viño. As súas rutas enoturísticas permiten descubrir viñedos únicos, coñecer adegas familiares, conversar cos viticultores e gozar dunha experiencia que combina turismo, patrimonio e gastronomía local.

Viños con presente e futuro

Esta nova fase de cooperación reafirma o compromiso de todos os participantes neste proxecto de cooperación coa posta en valor dos viños galegos e coa construción dun modelo de turismo sostible, que respecta o medio ambiente e xera novas oportunidades para o rural.